ئەندامێكی پەرلەمانی عێراق حكومەتەكەی مستەفا كازمی سەرۆك وەزیران بە حكومەتی “ئاگر و قەیرانەكان” وەسف دەكات و داواش دەكات، دەستلەكاربكێشێتەوە، ئەوەش دوای كەوتنەوەی ئاگر لە نەخۆشخانەیەكی پارێزگای زیقار و گیانلەدەستدانی دەیان كەس.
حەسەن سالم ئەندامی پەرلەمانی عێراق لە بەیاننامەیەكدا ئاماژەی بەوەداوە، لەسەر حكومەتەكەی كازمی كە حكومەتی ئاگر و قەیرانەكان و برسی كردنی خەڵكە دەستبەجێ دەست لەكار بكێشێتەوە، ئەوەش لەپێناو پاراستنی خوێنی عێراقیەكان.
ئاماژەی بەوەشداوە، رووداوی ئاگر كەوتنەوە لە نەخۆشخانەیەكی ناسریە كە بووەتە هۆی گیان لەدەستدانی 63 كەس و برینداربوونی 100 كەسی تر، بەهۆی بەهەند وەرنەگرتنی گیانی ئەو خەڵكەیە كە دەچنە نەخۆشخانەكان بۆ پاراستنی ژیانیان، بەڵام بە سوتاوی دەهێنرێنە دەرەوە ئەوەش بەهۆی پشتگوێخستن و گەندەڵی.
ئەو پەرلەمانتارە هێمای بۆ ئەوەشكردووە، حكومەت دروستكردنی لیژنەكان دوادەخات، هەروەها ئەو لیژنانە هیچ سودێكیان نییە و سنورێكیان بۆ گەندەڵی و بە هەند وەرنەگرتنی ژیانی خەڵك دانەناوە.