وەزارەتی گواستنەوە و گەیاندنی حكومەتی هەرێمی كوردستان ئاشكرایكرد، لەگەڵ كۆمپانیاكانی هێڵی ئینتەرنێتدا كۆبوونەتەوە و رێكەوتوون بۆ راگرتنی هێڵەكانیان لە كاتی تاقیكردنەوەكانی ئەمساڵ.
وەزارەتی گواستنەوە و گەیاندن لە بڵاوكراوەیەكدا ئاماژەی بەوەداوە، ئانۆ جەوهەر وەزیری گواستنەوە و گیاندن لەگەڵ نوێنەرانی سەرجەم كۆمپانیاكانی بواری خزمەتگوزاری گەیاندن كۆبوونەتەوە و ئامانجی سەرەكی كۆبوونەوەكە راگرتنی خزمەتگوزاریەكانی ئینتەرنێت بوو لەكاتی ئەنجامدانی ئەزمونەكانی ئەمساڵ.
رونیشكراوەتەوە، بە هەماهەنگی وەزارەتی پەروەردە بۆ رێگری كردن لە دیاردەكان و شێوازەكانی غەش كردن لە ئەزموونەكانی ئەمساڵ، لە كۆبوونەوەكەدا گفتوگۆكرا لەبارەی دانانی رێوشوێنی تایبەت بە رێگری كردن لەو دیاردانە كرا، هەروەها بڕیاردرا بە راگرتنی سەرجەم داتا و خزمەتگوزاریەكانی ئینتەرنێت لەكاتی دیاری كراوی رۆژانە تا پرۆسەی تاقیكردنەوەكان كۆتایی دێت.
وەزارەتەكە جەختیلەوەشكردووەتەوە، هەر لەكۆبوونەوەكەدا باس لە كێشەو نارەزایی هاوڵاتیان و بەكارهێنەرانی هێڵەكانی گەیاندن بەتایبەت خزمەگوزاری ئینتەرنێت كرا كە پێویستە باشتر بكرێن و بەدواداچونیان بۆ بكرێت.
