وەزارەتی دەرەوەی ئێران هەڵكردنی ئاڵای كوردستان لە كاتی پێشوازی لە سەرۆكی هەرێم لە فڕۆكەخانەی تاران بە هەڵە ناودەبات.
رۆژی پێنج شەممە نێچیرڤان بارزانی سەرۆكی هەرێمی كوردستان و شاندی یاوەری بەمەبەستی بەشداری لە رێورەسمی سوێندخواردنی ئیبراهیم رەئیسی سەرۆككۆماری نوێی ئێران سەردانی ئەو وڵاتەیان كرد، ئەوەی بووە جێی سەرنج لە فڕۆكەخانەی مێهرئاباد لە كاتی پێشوازی لە شاندی هەرێم، ئاڵای كوردستان هەڵكرابوو، ئەوەش خوێندنەوەی جیاجیای بۆكرا.
لەو بارەوە سەعید خەتیب زادە وتەبێژی وەزارەتی دەرەوەی ئێران رایگەیاندووە، دانانی ئەو ئاڵایە لە مەراسیمی پێشوازی لە نێچیرڤان بارزانی هەڵەیەكی پرۆتۆكۆلی بووە و بەسەریاندا تێپەڕیوە.
وتیشی: ئێران بەردەوام رێزی لە یەكپارچەیی و سەروەری خاكی عێراق گرتووە و سیاسەتەكەشیان لەو بارەوە هیچ گۆڕانكارییەكی بەسەردا نەهاتووە.
جێی باسە لە كاتی پێشوازی ئیبراهیم رەئیسی لە نێچیرڤان بارزانی تەنها ئاڵای عێراق لەگەڵ ئاڵای ئێران دانرابوو.
