ئەعرەجی: كشانەوەی هێزەكانی هاوپەیمانان لە عێراق دەرەنجامی گفتوگۆی ستراتیژییە

راوێژكاری ئاسایشی نەتەوەیی عێراق كشانەوەی هێزێكی هاوپەیمانان بە وەڵامدەرەوەی دەرهاویشتەكانی گفتوگۆی ستراتیجی نێوان بەغدا و واشنتن ناوبرد.
قاسم ئەعرەجی راوێژكاری ئاسایشی نەتەوەیی عێراق لە تویتێكدا لە هەژماری تایبەتی خۆی لە تۆڕی كۆمەڵایەتی تویتەر، كشانەوەی هێزێكی هاوپەیمانان بە وەڵامدەرەوەی دەرهاویشتەكانی گفتوگۆی ستراتیجی نێوان بەغدا و واشنتن ناوبرد و نووسیویەتی “ئەم هەنگاوە سەلماندنی پابەندبوونی عێراق و ئەمەریكا بە رێككەوتنەكەیان”.
پێشتر وەین مارۆتۆ، وتەبێژی هاوپەیمانی نێودەوڵەتی دژ بە داعش رایگەیاند “دوای كۆتاییهاتنی ئەركەكەیان، هێزی (ئۆ تی ئێچ)ی سەر بە هاوپەیمانی نێودەوڵەتی دژی داعش، كشاوەتەوە و گەڕاوەتەوە بۆ بنكەی بورینگ لە كوێت”.
لەسەردانی ئەم دواییەی مستەفا كازمی سەرۆكوەزیرانی عێراق بۆ ئەمریكا هەر دوولا رێككەوتن لەسەر ئەوەی تا كۆتایی ئەمساڵ هێزە شەڕكەرەكانی ئەمریكا لە عێراق بكشێنەوە.