پرۆسەیەكی ئەمنی فراوان لە باكوری بەغدا دەستی پێكرد

شانەی راگەیاندنی ئەمنی عێراق ئاشكرای كرد، پرۆسەیەكی ئەمنی فراوانیان لە ناوچەكانی باكوری بەغدا دەست پێكردووە، ئەوەش بۆ راوەدونانی پاشماوەكانی رێكخراوی داعش.
شانەی راگەیاندنی ئەمنی لە بەیاننامەیەكدا بڵاویكردووەتەوە، سەرلەبەیانی ئەمڕۆ شەممە، پرۆسەیەكی ئەمنی فراوان لە ناوچەكانی باكوری بەغدا دەستی پێكردووە.
رونیشكراوەتەوە، لە پرۆسەكەدای هێزە تایبەتەكان، پۆلیسی فیدراڵی، حەشدی شەعبی و دەزگای ئەمنییەكانی تر بەشدار دەبن و بەپێی زانیاری وردی هەواڵگری و بە سەرپەرشتی فەرماندەیی پرۆسەكانی بەغدا دەستی پێكردووە.
بەپێی بەیاننامەكە، ئامانجی پرۆسەكە راوەدونانی پاشماوەكانی رێكخراوی داعش و پاككردنەوەی ناوچەكەیە لێیان، هەروەها فڕۆكە جەنگیەكانی سوپا و هاوپەیمانان پاڵپشتی ئاسمانی دابین دەكەن.