پەرلەمانتارێكی كوردستان سەپاندنی باج بە سەر میوانانی چێشتخانە و هۆتێلە چوار ئەستێرە و پێنج ئەستێرەكان بە نایاسایی ناو دەبات دەشڵێت: چاكسازی ڕاستەقینەو ڕاستكردنەوەی دۆخی نالەباری دارایی، بە كۆتایهێنان بە گەندەڵی دەبێت لە سەرچاوەكانی داهات.
عومەر گوڵپی ئەندامی پەرلەمانی كوردستان رایگەیاند: بەبێ بوونی پاڵپشتی یاسایی، حكومەت بڕیاریداوە ڕاستەوخۆ بڕێك پارە لەسەر پسوڵەی خواردنی هاووڵاتیان وەرگرێت لە چێشتخانەكان، وەرگرتنی ئەم باجە نایاساییە، هەروەها بە زیانیش بۆ دۆخی ئابوری بازاڕ لە هەرێم دەشكێتەوە، ئەمە بێجگە لەوەی دەبێتە هۆی وەرگرتنی دوو جاری باج، جارێك بەناوی باجی دەرامەت لە قازانج بە شێوەی ساڵانەو جارێكیش ڕاستەوخۆ لە هاووڵاتیان.
راشیگەیاندووە، هاووڵاتیەك بۆ هەموو باجو خەراجێكی لەسەر بێت بەڵام كۆمپانیاكانی نەوتوپەیوەندیو سەدان گەورە كۆمپانیای حزبیو نزیك لە حزبەكانی دەسەڵات بەناوی جیاجیاوە خۆیان لە باج بدزنەوە؟
جەختیشی كردوەتەوە، چاكسازی ڕاستەقینەو ڕاستكردنەوەی دۆخی نالەباری دارایی، بە كۆتایهێنان بە گەندەڵی دەبێت لە سەرچاوەكانی داهات، كۆتایهێنان بە كاری نایاسایی و دۆخی ناشەفافییەت لە داهاتەكانی نەوت و گومرگ دەبێت، چارەسەر بە سەپاندنی باج دەبێت بەسەر كۆمپانیا زەبەلاحەكانی حزب و نزیك لە حزب، نەوەك سەپاندنی جۆرێك لە باج و سەرانە كە ئەبێتە هۆی بارگرانی هاووڵاتیان بەتایبەت كەمكردنەوەی چالاكی ئابوری و جوڵەی بازاڕ.
لە كۆتاییشدا رایگەیاندووە، بە نوسراوی فەرمی داوایان كردووە، باجی ڕاستەوخۆی سەر خواردنی هاووڵاتیان لە چێشتخانەكانی چوار ئەستێرەو پێنج ئەستێرە هەڵبوەشێتەوەو تەنها باجی دەرامەت بە شێوەیەكی دروست و یاساییانەو دوور لە گەندەڵی وەربگیرێت.
