ژمارەیەك سەرۆك و سەركردە و ئەمیر و وەزیری وڵاتانی ناوچەكە و جیهان گەیشتنە شاری بەغدا بۆ بەشداریكردن لە “كۆنفرانسی بەغدا بۆ هاوكاری و هاوبەشی” و یەكێك لەوانەش ئیمانوێڵ ماكرۆن سەرۆكی فەرەنسایە، كە لە كۆنگرەیەكی رۆژنامەوانیدا وتی، هاتونەتە بەغدا بۆ پشتگیری كردنی سەقامگیری عێراق و ناوچەكە.
ئیمانوێڵ ماكرۆن لە كۆنگرەیەكی رۆژنامەوانی هاوبەشدا لەگەڵ مستەفا كازمی سەرۆك وەزیرانی عێراق وتی، وڵاتەكەی پاڵپشتی سەقامگیری عێراق و ناوچەكە دەكات و هاوبەشییەكی باشیان لەگەڵ عێراق هەیە، پێویستە بێ خەم نەبین چونكە هەڕەشەی داعش بەردەوامە.
رونیشیكردەوە، هاتونەتە بەغدا بۆ پاڵپشتی كردنی سەقامگیری عێراق و ناوچەكە و ژیانێكی باشتریان بۆ خەڵكی ناوچە ئازاد كراوەكان دەوێت، چەندین كۆمپانیای فەرەنسی لە عێراقن و لە چەندین پرۆژەدا كار دەكەن، پشتگیری هەوڵەكانی حكومەتی عێراقیش دەكات بۆ جێیەجێ كردنی پەڕەی سپی چاكسازی و ئەنجامدانی هەڵبژاردن.
لای خۆشیەوە مستەفا كازمی لە كۆنگرە رۆژنامەوانیەكەدا وتی، سوپاسی ماكرۆن دەكات بۆ بەشداری كردن لە كۆنفرانسەكە و سورن لەسەر هاوبەشی لەگەڵ فەرەنسا و سەرجەم وڵاتانی تر، عێراق و فەرەنسا هاوبەشی سەرەكین لە شەڕی دژی داعشدا و ئەو وڵاتە هاوكار بووە لەو شەڕەدا.
دوای بینینی مستەفا كازمی سەرۆكی فەرەنسا چووە كۆشكی سەلام و چاوی بە بەرهەم ساڵح سەرۆك كۆمار كەوت و بڕیارە لە “كۆنفرانسی بەغدا بۆ هاوكاری و هاوبەشی” بەشداری بكات كە ئەمڕۆ كارەكانی دەست پێدەكات و ژمارەیەك كەسایەتی سیاسی و سەرۆك و سەرۆك وەزیرانی و وەزیرانی دەرەوەی وڵاتانی ناوچەكە بەشدار دەبن.
