ئەنجومەنی نوێنەرانی ئەمریكا پڕۆژەیاسای بودجەی بەرگریی وڵاتەكەی بە گوژمەی 778 ملیار دۆلار پەسەند كرد، كەتیایدا زیاتر لە نیو ملیار دۆلار بۆهاوكاری هێزە عێراقییەكان و پێشمەرگە و شەڕڤانانی سوریای دیموكراتی (هەسەدە) تەرخان كراوە.
لە دانیشتنی ئەنجوومەنی نوێنەرانی ئەمریكادا پڕۆژەیاسای بودجەی بەرگریی وەزارەتی بەرگریی ئەمریكا كە لە مانگی ئایار پێشكەشی كۆنگرێسی كردبوو بە دەنگی “بەڵێ”ی 316 ئەندام بەرامبەر 113 دەنگی “نەخێر” پەسەند كرا.
ئەوەی بووە جێی سەرنج ئەوە بوو، ژمارەیەك بڕگە و بابەت بۆ پڕۆژەیاساكە زیاد كران و نزیكەی 25 ملیار دۆلار بە بودجەكە زیاد كرا و گوژمەكەی گەیەندرایە 778 ملیار دۆلار.
لەنێو پڕۆژەیاساكەدا لە میانی بەرەنگاربوونەوەی داعش و مەشق و راهێنان و پشتیوانییە سەربازییەكاندا، بڕی 345 ملیۆن دۆلار بۆ هێزە عێراقییەكان و پێشمەرگە و 177 ملیۆن دۆلاریش بۆ هێزەكانی سوریای دیموكراتی (هەسەدە) تەرخان كراوە.
