سەرۆكی هەرێمی كوردستان لەگەڵ وەزیری بازرگانیی توركیا لە هەولێر كۆبووەوە و جەختی لەوە كردووەتەوە كە دەرفەتەكانی سەرمایەگوزاری و وەربەرهێنانی توركی لە هەرێمی كوردستان “زۆر لەبار و فراوانن”، ئامادەییی هەرێمی كوردستانیشی بۆ پێشكەشكردنی “هەموو ئاسانكارییەكی پێویست بۆ سەرمایەگوزاری و بازرگانیی توركیا لەگەڵ هەرێمی كوردستان و عێراق نیشان دا.”
نێچیرڤان بارزانی، سەرۆكی هەرێمی كوردستان لەگەڵ مەهمەت مووش، وەزیری بازرگانیی توركیا كۆبوەوە و بەپێی راگەیێندراوی كۆبوونەوەكە، “جەختیان لە خواستی برەودان بە پەیوەندییە بازرگانی و ئابوورییەكانی هەرێمی كوردستان و عێراق لەگەڵ توركیا كردەوە و هاوڕا بوون كە پێویستە هەموو گرفتەكانی بەردەم فراوانكردنی بوارەكانی بازرگانی و ئابووری لەنێوان هەردوولادا چارەسەر بكرێن.”
نێچیرڤان بارزانی رایگەیاندووە، ستراتیژ و بیركردنەوەیەكی تازەی توركیا بۆ چۆنیەتیی فراوانكردنی بوارەكانی بازرگانی و چالاكیی ئابووری و وەبەرهێنان لە هەرێمی كوردستان و عێراق پێویستە قورسایی بخاتە سەر وەبەرهێنان زیاتر لە بازرگانی.
پەیوەندییە ئابووری و بازرگانییەكانی هەرێمی كوردستان لەگەڵ توركیا، وەك سەرۆكی هەرێمی كوردستان ئاماژەی بۆ كردووە، “گرنگ و ستراتیژی”ـن دەشڵێت، “یاسای وەبەرهێنان لە هەرێمی كوردستان یاسایەكی دۆستانەیە كە هانی سەرمایەگوزاریی بیانی دەدات، هەروەها ئامادەیی هەرێمی كوردستانی بۆ پێشكەشكردنی هەموو ئاسانكارییەكی پێویست بۆ سەرمایەگوزاری و بازرگانیی توركیا لەگەڵ هەرێمی كوردستان و عێراق نیشان دا.”
