جەمیل بایك هاوسەرۆكی كۆما جڤاكێن كوردستان “كەجەكە” دەڵێت، لە هەر شوێنێكی جیهان وڵاتێك چەكی كیمیایی بەكاربهێنێت قیامەت هەڵدەستێنن، بەڵام توركیا چونكە ئەندامی ناتۆیە وڵاتانی رۆژئاوا بێدەنگن، باس لەوەشدەكات، هەوڵێكی هەیە بۆ ئەوەی لە رێگەی لاوازكردنی یەكێتیی نیشمانیی كوردستانەوە، گەلی كورد لاواز بكرێت.
جەمیل بایك لە چاوپێكەوتنێكی میدیای حزبەكەیدا وتی، لەئێستادا لەناو یەكێتی كێشە دروست بووە دوژمنانی كورد دەیانەوێت ئەو كێشانە گەورەتر بكەن، دەیانەوێت یەكێتی و كورد لاواز بكەن بۆ ئەوەی ئامانجەكانی خۆیان بە ئاسانی بەدی بهێنن، بۆیە پێویستە گەلی ئێمە بەتایبەت لە سلێمانی وشیار بن.
وتیشی، پێویستە رێگە نەدرێت یەكێتی لاواز ببێت، خەڵكی سلێمانی خەڵكێكی وشیار و رۆشنبیرە لەوبارەیەوە تایبەتمەندی هەیە بۆیە دەیانەوێت سلێمانی لاواز بكەن بۆ ئەوەی گەلی كورد چاو لە خەڵكی سلێمانی نەكات.
هاوسەرۆكی كەجەكە جەختی لەوەش كردووەتەوە، دەوڵەتی توركیا دژی كوردە و سیاسەتی قڕكردن بەڕێوەدەبات نایەوێت كوردێكی ئازاد دروست ببێت و پێشبكەوێت، لە هەر شوێنێك كوردێكی ئازاد هەبێت ئەوان هێرشی دەكەنە سەر وەك شوێنەكانی تر لە سلێمانیش لەسەر ئەو بنەمایە كار دەكات، ئێستاش دەیانەوێت بەبیانووی توركمانەكانەوە هێرش بكەنە سەر باشووری كوردستان.
بایك پێشی وایە، لە هەر شوێنێكی دنیا وڵاتێك چەكی كیمیایی بەكاربهێنێت قیامەت هەڵدەستێنن تەنانەت ئەگەر بیانەوێت وڵاتێك بەكارینەهێنابێت دەڵێن بەكاری هێناوە، بەڵام دەوڵەتی توركیا چونكە ئەندامی ناتۆیە وڵاتانی رۆژئاوا بێدەنگن بەرامبەر ئەوەی چەكی كیمیایی دژی گەریلا بەكاردەهێنێت، جەختیش دەكاتەوە، تائێستا توركیا 158 جار چەكی كیمیایی بەرامبەر كورد بەكارهێناوە.
