“داهاتی گومرکی دەروازە سنوورییەکانی هەرێم بۆ بەرزترین ئاست بەرزبووەتەوە”

بەڕێوەبەری گشتیی گومرکی هەرێم رایگەیاند، داهاتی ئەم مانگەی گومرک لە دەروازە سنوورییەکان بەرزترین ئاست بەرزبووەتەوە و چاوەڕوان دەکرێت لە ماوەکانی داهاتوودا زیاتریش بەرزببێتەوە.

سامان عەبدولڕەحمان، بەڕێوەبەری گشتیی گومرکی هەرێم بە ئاژانسی فەرمی هەواڵی عێراقی راگەیاندووە:” داهاتی مانگی ئەیلولی ئەمساڵی دەروازە سنوورییەکان گەیشتووەتە بەرزترین ئاست و بۆ 120 ملیار دینار بەرزبووەتەوە “.

ئاماژەی بەوەشکردووە:” هۆکاری بەرزبوونەوەی داهاتەکان کەمبوونەوەی رێژەی توشبووانی کۆرۆنا و رێککارەکانی خۆپارێزییە لەو پەتایە “.

ئەوەشی خستەڕوو:” لەئەنجامی رێککارەکانی حکومەتی هەرێم بۆ رووبەڕووبوونەوەی گەندەڵی و قاچاخچێتی و جێبەجێکردنی یاسای چاکسازی پێشبینی دەکرێت لە مانگەکانی داهاتوودا داهاتی دەروازەکان زیاتر بەرزبنەوە “.