سەرۆكی لیژنەی دارایی لە پەرلەمانی كوردستان رایگەیاند، ئێستا رۆژانە سەروی 500 هەزار بەرمیل نەوت دەفرۆشرێت، “بێجگە لەوەی كە مانگانە بڕێكی دەدرێتە وەزارەتی دارایی و ئابوری بۆ موچە ئەوەی دیكە تائێستا نازانم چۆن خەرج دەكرێت”
زیاد جەبار، سەرۆكی لیژنەی دارایی پەرلەمان كە لە هەمان كاتدا سەرۆكی فراكسیۆنی یەكێتیشە لە پەرلەمانی كوردستان لەمیانی چاوپێكەوتنێكدا رایگەیاند، “ئێستا كە نەوت لە سەروی 80 دۆلارەوە دەفرۆشرێت تەحەدا دەكەم نەك من لە هەرێمی كوردستاندا بە وەزیری دارایی و ئابوریشەوە بە وەزیری سامانە سروشتییەكانیشەوە بێجگە لەو بڕەی كە مانگانە دەگاتە وەزارەتی دارایی بۆ پشتیوانی موچە ئاگاداری یەك دیناری تر بن لە پارەی فرۆشتنی نەوت”.
ئاماژەی بەوەشكرد، ئێستا رۆژانە سەروی 500 هەزار بەرمیل نەوت دەفرۆشرێت، “بێجگە لەوەی كە مانگانە بڕێكی دەدرێتە وەزارەتی دارایی و ئابوری بۆ موچە ئەوەی دیكە تائێستا نازانم چۆن خەرج دەكرێت، رەنگە بڵێن ئەمە ئیشی تۆ نیە و ئیشی سامانە سروشتییەكانە بەڵام دڵنیام ئەوانیش ئاگایان لێی نیە كە ئەو پارەیە بۆ كوێ دەچێت”.
زیاد جەبار باسی لەوەشكرد، “ئەو دەروازە سنوریانە كە بە ئەلیكترۆنی بەستراونەتەوە بە وەزارەتی دارایی و ئابوریی و بەڕێوەبەرایەتی گشتی گومرگەوە بریتین لە باشماخ، پەروێزخان و حاجی ئۆمەران و تا ئێستا دەروازەی ئیبراهیم خەلیل نەبەستراوەتەوە و ساڵی رابردوش كۆتا ئاگاداركردنەوە دراوە بە بەرپرسانی دەروازەكە و تا ئێستاش جێبەجێ نەكراوە”.
