لەسەر سكاڵای پەرلەمانتارێكی پارتی سزای شەش مانگی تر زیندان بەسەر رۆژنامەنووس ئومێد بەرۆشكی یەكێك لە دەستگیركراوانی بادینان سەپێنرا.
لەو بارەوە ریڤینگ یاسین، پارێزەری ئەو رۆژنامەنووسە رایگەیاند، رۆژی یەكشەممە لە دادگای دهۆك دانیشتنێكی دیكە دادگاییكردنی ئومێد بەروشكی بەڕێوەچوو، لەسەر سكاڵای مەلا ئیحسان، پەرلەمانتاری پارتی كە ئەو رۆژنامەنوسەی بە ناوڕزاندن تۆمەتبار كردبوو.
ئاماژەی بەوەشكردوە، دادگا بڕیاریدا شەش مانگ بەسەر ئومێد بەروشكیدا بسەپێنێت، بەوەش كۆی گشتی سزاكان كە تا ئێستا بەسەریدا سەپێنراوە گەیشتە دوو ساڵ و شەش مانگ، بەڵام داوای پێداچوونەوە دەكەن بە بڕیارەكەدا.
پارێزەری ئەو رۆژنامەنووسە باسی لەوەشكرد، “هەمو بەڵگەكان لەبەردەست بوون بۆ ئەوەی دادگاییكردنەكە وەكو رۆژنامەنوسێك بەڕێوەبچێت و سەندیكای رۆژنامەنوسانیش ئامادەیی دەربڕیبوو بۆ ئامادەبوون لە دادگا، بەڵام دادگا داوەكاریەكەی رەتكردەوە”.
باسی لەوەشكرد، دانیشتنی دادگا بەرێگایەكی هەڵەدا رۆشت، دەبوو بەپێی یاسای رۆژنامەوانی مامەڵە بكرایە.
