نەتەوە یەكگرتووەكان لەسەر قەیرانی كۆچەرانی سەر سنورەكانی بیلاڕوسیا و پۆڵەندا كە زۆرینەیان كوردن جەخت لەوە دەكاتەوە، ئەو كۆچەرانە هیچ مەترسییەك دروست ناكەن و هاوڵاتیانی برسی و ماندوون.
فەرحان حەق وتەبێژی فەرمی بەناوی نەتەوە یەكگرتووەكانەوە ئاماژەی بەوەداوە، مافی هەر دەوڵەتێكە چۆن مامەڵە لەگەڵ بارودۆخەكانی سەر سنورەكانی دەكات، بەڵام ئەوەی دەیانەوێت بیڵێن ئەوەیە كە ناكرێت وەك هەڕەشەیەك سەیری گروپێك خەڵك بكرێت.
رونیشیكردووەتەوە، داوا لە هەموان دەكەن بەو شێوەیە سەیریان بكەن، ئەو كۆچەرانە هێزێكی سەربازی نین و گروپێكی برسی و ماندوون و هیچ هەڕەشەیەك دروست ناكەن.
لە ئێستادا ژمارەیەكی زۆر كۆچەر لەسەر سنورەكانی بیلاڕوسیا و پۆڵەندا گیریان خواردووە و حكومەتی پۆڵەندیش هەزاران سەربازی ناردووەتە سەر سنورەكان بۆ رێگری كردن لێیان، چەندین وڵاتیش ئەندامانی سەربازی دەنێرنە سەر سنورەكان بۆ هاوكاری كردنی ئەو وڵاتە.
