سیروان محەمەد سەرۆكی ژوری بازرگانی سلێمانی دەڵێت، پرۆسەی بازرگانی لە هەرێم و بەتایبەت لە سلێمانی لاواز بووە و زۆربەی بازرگانەكان دەروازە سنوریەكانی هەرێمیان جێهێشتوە و رویان لەدەروازە سنوریەكانی عیراق كردوە.
سیروان محەمەد بە دەنگی ئەمریكای وتووە، لاواز بوونی پرۆسەی بازرگانی پەیوەندی بە كارئاسانی عیراقەوە هەیە لە دەروازە سنوریەكان بۆ بازرگانەكان، بازرگانی لە دەروازەكانی هەرێم تێچووی زیاترە بۆیە بازرگانەكان ڕوو لە دەروازەكانی عیراق دەكەن.
رونیشیكردووەتەوە، رۆشتنی بازرگانەكان زیاتر كاریگەری لەسەر جوڵەی بازرگانی لەدەروازەی پەروێزخان هەبووە، بەڵام كەم تا زۆر كاریگەری لەسەر دەروازەی باشماخیش بەجێهێشتوە، حكومەتی هەرێمیشمان لە مەترسیەكانی رۆیشتنی بازرگانان بۆ دەروازەكانی عیراق ئاگادار كردوەتەوە.
سەرۆكی ژوری بازرگانی سلێمانی جەختی لەوەش كردووەتەوە، حكومەتی عێراق زۆر باڵادەست نییە بەسەر دەروازەكاندا بۆیە كارئاسانی زیاتر لەدەروازەكانی دەكرێت.
