رێواز فایەق سەرۆكی پەرلەمانی كوردستان باس لەوە دەكات، گەلی ئێمە ئارەزومەندانە قەبوڵی كردووە، جارێكی دیكە لەگەڵ عیراقێكی نوێ مامەڵە بكات و عیراقێكی بەهێزمان دەوێت لە رووی سیاسی و ئابورییەوە.
رێواز فایەق لەمیانی بەشداریكردنی لە كۆڕبەندی ئاشتی و ئاسایشی رۆژهەڵاتی ناوەڕاست وتی، عیراق پێویستی بە سەقامگیری هەیە لە رووی پاراستنی سەروەری سنوورەكان، هەمەچەشن كردنی سەرچاوەكانی داهات و قەبوڵكردنی ئەوەی سیستمی عیراق بووەتە فیدراڵی.
وتیشی، عیراق دەتوانێت ببێتە هەوێنی سەقامگیری لە تەواوی ناوچەكە، نوخبەی سیاسی و سەركردایەتی سیاسی كوردستان لە ساڵی 2003 بەدەستپێشخەری خۆیان و ئیرادەی خۆیان بەشداربوون لە بونیادنانەوەی عیراقێكی نوێ، وەرگرتنی ئەم ئێرادەیە لە رووی جەماروەرییەوە بوو كە گەلی كوردستان دەنگی لەسەر دەستووردا، واتا گەلی ئێمە ئارەزومەندانە قەبوڵی كردووە جارێكی دیكە لەگەڵ عیراقێكی نوێ مامەڵە بكات.
سەرۆكی پەرلەمانی كوردستان جەختی لەوەش كردووەتەوە، هەموومان پێداگری لەسەر ئەوە دەكەین دەستوور وەكو خۆی جێبەجێ بكرێت، بەڵام راستییەك هەیە ئەویش دەبێت ئێمە شتێكی دیكە لەخۆماندا بگۆڕین، دەبێت نوخبەی سیاسی بڕوا بەخۆی بێنێت ئەم وڵاتە لە سیستمێكی مەركەزییەوە گۆڕانكاری بەسەردا هاتووە و بووە بە دەوڵەتێكی فیدراڵی، عیراقێكی بەهێزمان دەوێت لە رووی سیاسییەوە، لە رووی ئابوورییەوە، عیراقێك بتوانێت لە رووی سیاسییەوە سەروەریی سنورەكانی خۆی بپارێزێت.
