لەكۆبونەوەی هەریەك لە جڤاتی نیشتیمانی و جڤاتی گشتی بزوتنەوەی گۆڕاندا، پڕۆژەی دروست كردنی دەستەی بەڕێوەبردنی بزوتنەوەی گۆڕان لەلایەن هەردو جڤاتەكەوە پەسەندكرا.
لە راگەیەندراوی كۆبوونەوەكەدا هاتووە، پرۆژەی دروستكردنی دەستەی بەڕێوەبردن لەلایەن هەردوو جڤاتی نیشتمانی و گشتییەوە پەسندكرا، كە بۆ ماوەیەكی كاتی دروست دەكرێت و ئەركەكانی بریتی دەبێت لە ئیدارەدانی بزووتنەوەكە و پێداچوونەوە بە وتاری سیاسی و میدیایی و ئامادەكاری بۆ ئەنجامدانی كۆنفرانسی نیشتمانی.
ئەوەش هاتووە، بۆ دیاریكردنی ئەندامانی ئەو دەستەیەش هەردوو جڤاتەكە گروپێكی پێنج كەسییان راسپاردووە كە هەستن بە ئەنجامدانی گفتوگۆی راستەوخۆ لەگەڵ ئەو هەڵسوڕاوە دیارانەی ئامادەن لە قۆناغی خۆڕێكخستنەوەی گۆڕاندا لە بزووتنەوەكەدا كار بكەن.
هەر بەپێی راگەیەندراوەكە، هەردوو جڤات دیدگایەكی هاوبەشیان گەڵاڵە كردووە بۆ خۆڕێكخستنەوە و بەخۆداچوونەوەی بزوتنەوەكە و راگەیاندنی ئاشتەوایی گشتی لەگەڵ هەموو ئەو كەس و هەڵسوڕاو و گۆڕانخواز و دەنگدەرانەی پێشتر كاریان لەگەڵ گۆڕان كردووە و ئێستا بە هەر هۆكارێك دووركەوتوونەتەوە.
