ئارام محەمەد وەزیری خوێدنی باڵای هەرێم سەبارەت بە توندوتیژیەكانی بەردەم زانكۆی سلێمانی بەرامبەر خوێندكارانی زانكۆ رایگەیاند، داوای لە پارێزگاری سلێمانی كردووە بە هێمنی مامەڵە لەگەڵ خوێندكاراندا بكرێت.
ئارام محەمەد لە پەیامێكدا بڵاویكردووەتەوە، تاوەكو ئێستا هیچ داواكارییەكی خۆێندكارانی بەدەست نەگەیشتووە و داوایان لێ دەكات یاداشتی بۆ بنوسن و چەند جارێك داوای كردووە دەرماڵە بدرێتە خوێندكاران، بەڵام بەهۆكاری جیاجیا دواخراوە.
سەبارەت بە توندوتیژیەكان بەرامبەر خوێندكارانی خۆپیشاندەر رونیكردووەتەوە، داوای لە پاریزگاری سلێمانی كردووە بە هێمنی مامەڵە لەگەڵ خۆپیشاندەرانی زانكۆی سلێمانی بكرێت و توندوتیژیان بەرانبەر بەكارنەهێنرێت.
چەند رۆژێكە بەشێك لە خوێندكارانی زانكۆ و پەیمانگاكانی سلێمانی و چەند ناوچەیەكی تر هۆڵەكانی خوێندنیان بایكۆت كردووە و دەستیان كردووە بە خۆپیشاندان و داوای خەرج كردنی دەرماڵەكانیان دەكەن، ئەمڕۆش لە بەردەم زانكۆی سلێمانی كۆبوونەوە و رێگریان لە مامۆستایانی زانكۆ كرد بەچنە ناو زانكۆوە، بەهۆی ئەوەشەوە توندوتیژی دروست بوو و هێزە ئەمنییەكان غازی فرمێسكڕێژیان بەرامبەریان بەكارهێنا.
