محەممەد مونیب پارێزەری میسری كە بەرگری لە سەدام حسێن دیكتاتۆری پێشووی عیراق كرد لە دادگا دەڵێت، ئەو چیرۆكەی لەسەر دەستگیر كردنی سەدام حسێن باس دەكرێت راست نییە و پۆڵ بریمەر حاكمی مەدەنی پێشووی عیراق درۆ دەكات.
كەناڵی روسیا ئەلیەوم لە زاری “محەممەد مونیب”ەوە بڵاویكردووەتەوە، كاتێك سەردانی سەدامی كردووە لە گرتووخانە پێی وتووە، لەكاتی دەستگیر كردنی ئەو خەوتبوو لەگەڵ ئەو چەكەی كە هەمیشە پێی بووە، بە دەنگی تەقەی سەربازە ئەمریكییەكان خەبەری بووەتەوە.
ئاماژەی بەوەشداوە، لەوانەیە لەلایەن یەكێك لەو كەسانەی كە لەگەڵیدا بوون سەدام حسێن دەرمانی بێهۆشبوونی درابێتێ و ئەوەش ئاسانكاری كردووە بۆ دەستگیر كردنی.
ئەو پارێزەرە باسی لەوەش كردووە، گێڕانەوەكانی پۆڵ بریمەر حاكمی مەدەنی پێشووی عیراق سەبارەت بەوەی كە سەدام لە چاڵێكدا دەستگیر كراوە، گێڕانەوەیەكی درۆیە و هەڵبەستراوە لەلایەن كەسێكەوە كە سەروەت و سامانی عیراقی بە تاڵان برد.
