بەڕێوەبەرایەتی كەشناسی و بومەلەرزەزانی هەرێم هۆشداری لە شەپۆلێكی باران بارین دەدات بەتایبەتی لە شاری هەولێر دەبێتە هۆی بەرزبوونەوەی ئاستی ئاو.
بەڕێوەبەرایەتییەكە لە هۆشدارییەكدا بڵاویكردووەتەوە، كاریگەری شەپۆلی باران بارین بە دوو قۆناغی دەست پێ دەكات، قۆناغی یەكەم لە كاتەكانی ئێوارەی پێنجشەممە باران بارین دەست پێ دەكات سەرەتا بە شێوەی نمە باران پاشان لە شەو درەنگدا تەواوی ناوچەكەمان باران بارینی دەبێت.
ئەوەش هاتووە، رۆژی هەینی كاریگەری هەردوو نزمە پاڵە پەستۆی دەریای ناوەڕاست و دەریای سور درێژدەبێتەوە بۆ سەر ناوچەكەمان بارانی بەلێزمە و بارانی بەردەوام دەبێت هەندێك كات بەرزبوونەوەی ئاستی ئاو دەبێت، لە سنوری پارێزگای هەولێر و سەنتەری پارێزگا ئاستی باران زۆر زیاتر دەبێت لە چاو ناوچەكانی تر.
هەر بەپێی هۆشدارییەكە، لە ماوەی ئەم قۆناغی باران بارینە ناوچە شاخاوییەكانی سنوری پارێزگای هەولێر و سلێمانی ئیدارەی راپەڕین رێژەی باران بارینی پێشبینیكراوی زیاتر دەبێت و هەندێ ناوچەی شاخاوی بڕی بارانی پێشبینیكراو لە 50 ملم زیاتر دەبێت وە لە سەنتەری پارێزگاكان بە گشتی لە 30 ملم نزیك دەبێتەوە، بەفر بارین تەنها لەسەر ناوچە سنوریەكان دەبێت و رۆژی شەممە قۆناغی یەكەمی باران بارین لاواز دەبێت و نمە باران و بارانی مامناوەند لە هەندێ ناوچە دەبێت .
سەبارەت بە قۆناغی دووەم باس لەوە كراوە، قۆناغی دووەمی شەپۆلی باران بارینەكە لە رۆژی دووشەممە دەست پێ دەكات سەرەتا لە سەر سنوری پارێزگای سلێمانی و هەڵەبجە پاشان درێژ دەبێتەوە بۆ سەر ناوچەكانی تر، ئاستی دابارین لەم قۆناغە مامناوەند دەبێت و بارستە هەواییەكی نیمچە سارد كار دەكاتە سەر ناوچەكەمان لە ماوەی ئەم قۆناغە بۆیە بەشێك لە ناوچە شاخاوییە بەرزەكان بەفر بارینی دەبێت، رۆژی سێشەممە و چوارشەممەش ئاسمان بەردەوام هەور و نمە باران و بارانی مامناوەند دەبێت رۆژی پێنجشەمممە كاریگەری ئەم شەپۆلە كۆتای دێت.
