بەپێی چەند بەڵگەنامەیەكی نهێنی كە لەماوەی رابردودا ئاشكرا كراون، بۆردومانەكانی ئەمریكا لە عیراق و سوریا و ئەفغانستان بوونەتە هۆی كوشتنی هەزارەها هاوڵاتی مەدەنی، تەنها لە یەكێك لەو بۆردومانانەدا لە ساڵی 2016 لە سوریا، 120 جوتیار و گوندنیشیان كوشتووە.
رۆژنامەی نیویۆرك تایمز بڵاویكردووەتەوە، بەپێی بەڵگەنامە نهێنییەكان كە 1300 راپۆرتن، پڕوپاگەندەی حكومەتی ئەمریكا كە گوایە پشت بە بۆمبی ورد لە پێكانی ئامانجدا دەبەستێت لە شەڕەكانیدا پێچەوانەی ئەو زیانانەن كە كەوتوونەتەوە لە ریزەكانی هاوڵاتیانی مەدەنی.
ئەوەش هاتووە، بەڵگەنامەكان تەنانەت یەك تۆماری تێدا نەبووە كە تێیدا هەڵەیەك ئەنجام نەدرابێت و رێوشوێن نەگیرابێتەبەر، هەروەها ژمارەی قوربانییەكان لە راپۆرتەكاندا زۆر كەمكراونەتەوە، تەنها لە یەك بۆردوماندا لە 19ی تەموزی ساڵی 2016 فڕۆكەكانی ئەمریكا كە گوایە بۆردومانی چەند پێگەیەكی داعشیان كردووە 120 جوتیار و گوندشینیان وكشتووە.
بەپێی هەمان ئەو بەڵگەنامانە، هەروەها لە مانگی تشرینی دووەمی ساڵی 2015 لە ناوچەی رومادی لە عیراق پیاوێك بۆردومان كراوە كە گوایە تەنێكی قورسی نەناسراو بەدوای خۆیدا رادەكێشێت و دەیبات بۆ ناوچەكانی ژێر دەستی داعش، دواتر دەركەوتووە كە تەنەكە منداڵێك بووە و لە بۆردومانەكاندا كوژراوە، هەروەها لە مانگی ئابدا فڕۆكەكانی ئەمریكا ئۆتۆمبێلێكیان لە ئەفغانستان بۆردومان كردووە كە گوایە بۆمبی تێدایە، بەڵام دواتر دەركەوتووە 10 ئەندامی یەك خێزانی تێدا بووە، هەروەها دەیان هاوڵاتی مەدەنی تر بریندار بوون و كەسانی خاوەن پێداویستی تایبەتن، تەنها 12 كەس قەرەبوویان وەرگرتووە.
