عەلا ركابی جێگری سەرۆكی هاوپەیمانی لەپێناو خەڵك رایگەیاند، هەردوو لایەنی پێكهێنەری هاوپەیمانیەكەیان “جوڵانەوەی نەوەی نوێ و بزوتنەوەی ئیمتداد”، بڕیاریانداوە بەرگری لە مافی موچەخۆرانی هەرێم بكەن لە پەرلەمان.
روكابی لە لێدوانێكی تەلەفزیۆنیدا وتویەتی، لە هەناوی كێشەكانی ئەم گەلەوە هاتوون بۆیە هەموو كاتێك لەگەڵ خەڵكدا دەبن و داواكارییە راستەقینەكانی خەڵك دەگەیەنن، هەروەها بابەتی بودجە و داهاتی گشتی بەردوام خاڵی ناكۆكی لایەنەكان بووە و پێیان وایە دەبێت هەموو هاوڵاتیان دەرفەتی یەكسانیان هەبێت لەخزمەتكردن و گەیاندنی خزمەتگوزارییەكان.
وتوشیەتی، لەگەڵ جوڵانەوەی نەوەی نوێ باسیان لەوەكردوە كە برایانیان لە هەرێمی كوردستان مافی ئەوەیان هەیە بودجەیان بۆ دابین بكرێت تاوەكو هاوشێوەی پارێزگاكانی دیكەی عیراق گەشەپێدان لەكوردستانیش بەردەوام بێت.
جێگری سەرۆكی هاوپەیمانی لە پێناو خەڵك جەختی لەوەش كردەوە، لەئێستادا گفتوگۆ لەگەڵ ژمارەیەك لە كاندیدە سەربەخۆكان دەكەن بۆ ئەوەی بچنە ناو هاوپەیمانییەكەیان، بۆیە چاوەڕێ دەكرێت لەماوەی داهاتوودا ژمارەی كورسییەكانیان زیاتربێت لەوەی راگەیەندراوە.
لە ئێستادا ژمارەی كورسییەكانی هاوپەیمانی لەپێناو خەڵك 28 كورسییە و پێشبینی ئەوە دەكەن لە داهاتوودا بگەنە 40 كورسی پەرلەمانیی.
