بەڕێوەبەرایەتی گشتی گەشتوگوزاری هەولێر ئاشكرای كرد، لەسەرەتای ئەمساڵەوە تاوەكو ئێستا، نزیكەی دوو ملیۆن گەشتیار هاتوونەتە هەولێر.
ئیسماعیل مینەخان بەڕێوەبەری گشتیی گەشتوگوزاری هەولێر وتویەتی، لە سەرەتای ئەمساڵەوە تاوەكو 23ی 12، یەك ملیۆن و 971 هەزار و 522 گەشتیار هاتوونەتە پارێزگای هەولێر، چاوەڕوان دەكرێت بەهۆی پشووەكانی سەری ساڵەوە ئەو ژمارەیە دوو ملیۆن تێبپەڕێنێت.
جەختی لەوەش كردووەتەوە، بەراورد بە دوو ساڵی رابردوو ژمارەی گەشتیاران بۆ نێو شاری هەولێر زیادیكردووە، بەشێوەیەك لە ساڵانی 2019 و 2020 ژمارەی گەشتیاران یەك ملیۆن و 860 هەزار و 236 گەشتیار بوو، بەڵام ساڵی 2021 ئەو ژمارەیە گەیشتووەتە نزیكەی دوو ملیۆن.
لەلایەكی ترەوە نادر رۆستی وتەبێژی دەستەكە وتویەتی، لە رۆژانی پشووەكانی سەری ساڵدا هاتووچۆی گەشتیاران ئاساییە و شوێنە گشتییەكان كراوەدەبن، كارئاسانی زۆرباش كراوە بۆ ئەو گەشتیارانەی كە دەیانەوێت بێنە هەرێمی كوردستان، بەهۆی شەپۆلی بەفریشەوە چاوەڕوان دەكرێت گەشتیارێكی زۆر روو لە هەرێم بكەن.
