وەزیری پلاندانان سەبارەت بەبودجەی پەرەپێدانی پارێزگاكان لەگەڵ پارێزگارەكانی هەولێر و هەڵەبجە و سەرپەرشتیاری ئیدارەی راپەرین و زاخۆ كۆبۆوە.
بەپێی راگەیەنراوێك كە ئومێد خۆشناو پارێزگاری هەولێر بڵاویكردۆتەوە، دارا رەشید وەزیری پلاندانان لەگەڵ ئومێد خۆشناو پارێزگاری هەولێر و پارێزگاری هەڵەبجەو سەرپەرشتیاری ئیدارەی راپەرین و زاخۆ بەئامادەبونی بریكارو بەڕێوەبەری گشتی پرۆژەكان لە وەزارەت كۆبۆوە.
ئاماژەی بەوەشكردوە، لەسەرەتای كۆبونەوەكە وەزیری پلاندانان ئاماژەی بە پلان و هەنگاوەكانی وەزارەت كردوە بۆ جێبەجێكردنی پرۆژەكان و كارئاسانی بۆ پارێزگاو یەكە ئیداریەكان كە لەم كابینەیەوە هەموو هەوڵێك بۆ ئەو پرۆژانەیە كە خزمەت بە دانیشتوانی هەرێم دەكات بەتایبەت ئاو و كارەباو رێگاوبان .
لەبەشێكی تری كۆبونەوەكە گفتوگۆ لەبارەی تەرخانكردنی بودجەی پەرەپێدانی پارێزگاكان كراوە بۆ ساڵی 2022و جێبەجێكردن و دیاریكردنی پرۆژەی پەرەپێدانی پارێزگاكان كە پێویستە رەچاوی ژمارەی دانیشتوان و پێویستی ناوچەكان بۆ پرۆژەكان بكرێت.
هەروەها هاتوە كە دارا رەشید رایگەیاندوە، هەماهەنگی نێوان وەزارەتەكان و پارێزگاكان هەنگاوێكی گرنگە بۆ بەردەوامیدانی پرۆژەخزمەتگوزاریەكان كە سود بە هاووڵاتیان بگەیەنێت.
