حاكم قادر حەمەجان ئەندامی ئەنجومەنی باڵای سیاسی و بەرژەوەندی یەكێتی دەڵێت، لە ئێستادا نرخی نەوت بەرزبووەتەوە، چیتر ناكرێت حكومەتی هەرێم بیانوو بۆ دواكەوتنی موچە و خراپی خزمەتگوزارییەكان بهێنێتەوە.
حاكم قادر حەمەجان لە دیدارێكدا لەگەڵ كۆمەڵەی كەلەپور و فۆلكلۆری كوردی وتی، بەدرێژایی مێژو سەرباری ئەو هەمو نەهامەتیەی بەسەر گەلی كورددا هاتووە، بەڵام كورد زۆر بەباشی كەلەپور و فۆلكلۆری خۆی پاراستووە، پێویستە رەسەنایەتی خۆمان بپارێزین و لەدەستی نەدەین.
سەبارەت بە پرسی هەڵبژاردنی پەرلەمانی كوردستان وتویەتی، نابێت پرسی هەڵبژاردنیش ببێتە خاڵێكی ناكۆكی دیكە و پێویستە لایەنەكان رێكەوتنی لەسەر بكەن و هەڵبژاردنەكانیش لەكاتی خۆیاندا بكرێت.
هەرچی سەبارەت بە دابەش كردنی موچە و خزمەتگوزاریەكانە، ئەو سەركردەی یەكێتی جەختی لەوە كردووەتەوە، پێویستە بەرزبونەوەی نرخی نەوت رەنگدانەوەی هەبێت لەسەر ژیان و بژێوی هاوڵاتیان و موچەخۆران، ناكرێت هیچ پاساوێك بهێنرێتەوە بۆ نەدان و دواكەوتنی موچەی فەرمانبەران و خراپی خزمەتگوزاریەكان.
