وەزارەتی نەوتی عیراق رایگەیاند، پرۆژەی راكێشانی بۆری نەوتی (بەسرە – عەقەبە) پڕۆژەیەكی نوێ نییەو بۆ هەشتاكانی سەدەی رابردوو دەگەڕێتەوە.
عاسم جیهاد وتەبێژی وەزارەتی نەوتی عیراق رایگەیاند: پرۆژەی راكێشانی بۆری نەوتی (بەسرە- عەقەبە) پڕۆژەیەكی نوێ نییەو بۆ هەشتاكانی سەدەی رابردوو دەگەڕێتەوەو لە دوای ساڵی 2003ـەوە، سەرجەم حكومەتە یەك لەدوا یەكەكانی عیراق پاڵپشتیان لە جێبەجێكردنی پڕۆژەكە كردوە.
باسی لەوەشكردوە، وەزارەتی نەوت پابەندە بەجێبەجێكردنی ئەو پرۆژانەی كە لەلایەن حكومەت و ئەنجومەنی نوێنەرانەوە پەسەند كراون تائێستاش پڕۆژەی راكێشانی بۆری نەوتی (بەسرە-عەقەبە) پەسەند نەكراوە، ئەوەش بەهۆی ئەوەی تائێستا رەوانەی هیچ لایەنێكی پەیوەندیدار نەكراوە، وەزارەتی نەوت پەرۆشی ئەوەیە سامانی وڵات بەباشی بەڕێوەببات و بیپارێزێت.
عاسم جیهاد رونیشیكردۆتەوە، پرۆژەكە دوو قۆناغ لەخۆدەگرێت، یەكەمیان بەسرە-حەدیسە بریتیە لە نۆژەنكردنەوەی ژمارەیەك بۆری گواستنەوەی نەوتی عیراق بۆ پاڵاوگەكانی نەوت و وێستگەكانی بەرهەمهێنانی كارەباو قۆناغی دوەمیش لە حەدیسە دەستپێدەكات بۆ 200 هەزار بەرمیل نەوت لە رۆژێكدا كە ئەمەش یەكەم بیرۆكەی پرۆژەكەیە، حكومەتی داهاتوی عیراقیش پڕۆژەكە لەگەڵ لایەنە پەیوەندیدارەكان هەڵدەسەنگێنێت بۆ ئەوەی جێبەجێ بكرێت.
