هۆشیار زێباری ئەندامی مەكتەبی سیاسی پارتی پێی وایە، پەكەكە و یەبەشە لەسەر ئاستی سیاسی و دارایی لەلایەن حەشدی شەعبییەوە پشتیوانی دەكرێن، ئەوەش بە عەیبە وەسف دەكات.
هۆشیار زێباری لە تۆڕی كۆمەڵایەتی تویتەر بڵاویكردووەتەوە، ئەوەی لە شنگال روودەدات كارەساتە، هێزەكانی “پەكەكە” و “یەبەشە”ی تیرۆرست لە ئێزدییە ناوخۆییەكان جڵەوی شنگالیان گرتووەتە دەست.
ئاماژەی بەوەشداوە، لەرووی سیاسی و داراییەوە لە سەرۆكایەتی دەستەی حەشدی شەعبییەوە پاڵپشتی دەكرێن لەلایەن “فالح فەیاز”ەوە، بۆیە هێزە عیراقییەكان ناتوانن رێكەوتنی شنگال جێبەجێ بكەن و ئاوارەكان بگەڕێنەوە، بۆ ئازادكردنی سەربازەكانیان دانوستان دەكەن، لە كۆتاییدا زێباری نوسیویشیەتی “عەیبە”.
هەرچەندە ماوەیەكی زۆر بەسەر رێكەوتنی شنگالدا تێپەڕیوە بەڵام تاوەكو ئێستا جێبەجێ نەكراوە، لە چەند رۆژی رابردوشدا كێشە لەنێوان هێزەكانی پەكەكە و سوپای عیراقیدا روویدا و چەند سەربازێكی عیراقی بەدیلگیران، بەڵام دواتر رادەست كرانەوە.
