بەڕێوەبەڕایەتی كۆمەڵگەی دەروازەی نێودەوڵەتی باشماخ ئاشكرای كرد، لە دەروازەكە كەسێك بە یەك كیلۆ تلیاكەوە دەستگیر كراوە كە لە ناو جلەكانیدا شاردبوویەوە.
دەروازەكە بڵاویكردووەتەوە، كاتژمێر 6:45 خولەكی بەیانی ئەمڕۆ سێشەممە رێكەوتی 26ی 4، لەلایەن یاریدەدەرێتی ئاسایشی باشماخەوە هاوڵاتییەكی هەرێمی كوردستان لەكاتی گەڕانەوەی لەدەروازەی باشماخ دەستگیر كرا و پاش پشكنین دەركەوت بڕی یەك كیلۆگرام ماددەی هۆشبەری جۆری “تلیاك”ی لەناو جلەكانیدا شاردووەتەوە.
رونیشكراوەتەوە، هاوڵاتیەكە لە دایكبووی ساڵی 1970یە و دانیشتووی یەكێك لە شارەكانی هەرێمە، پاش دەستبەسەرداگرتنی پەڕاوی لێكۆڵینەوەی بۆ كرایەوە و رەوانەی دادگا كرا بەمەبەستی وەرگرتنی سزای یاسایی.
بەڕێوەبەڕایەتی كۆمەڵگەی دەروازەی نێودەوڵەتی باشماخ دڵنیاییشی داوە لەوەی، بەردەوام دەبن لە رێگریكردن لە هاوردەكردنی هەر كاڵایەكی قەدەغەكراو و نایاسایی.
