هەندرێن محەمەد سەرۆكی كۆمسیۆنی باڵای سەربەخۆی هەڵبژاردنەكانی هەرێمی كوردستان دەڵێت، ئەنجامنەدانی هەڵبژاردن بژاردەیەكی ئاسان نییە و پێویستە كۆمسیۆن كارابكرێتەوە یاخود كۆمسیۆنێكی نوێ هەڵبژێرن.
هەندرێن محەمەد بە دەنگی ئەمریكای وتووە، پێیان باشە ئەو دامەزراوە فەرمییە ئەكتیڤ بكرێتەوە یاخود هەڵبژێردرێتەوە، ئینجا دوایی بابەتی ئەوەی كە یاسا دەگوڕدرێت، هەڵبژاردن دەكرێت یاخودنا، چونكە یەكێكە لە دامەزراوەكانی هەرێمی كوردستان پێویستە وەك تەواوی دامەزراوەكانی دیكە كار بكات، كاری كۆمسیۆن جگە لە ئامادەكاری بۆ هەڵبژاردن ماوەیەكیشی پێویستە بۆ ئامادەكاری و بنیاتنانی كارمەندان و كاروباری ئیداری و دارایی.
رونیشیكردووەتەوە، چاوەڕێی پەرلەمانن و پێشتریش پەرلەمانیان لە تەواوبونی وادەی كۆمسیۆن ئاگاداركردوەتەوە، لەكاتی گەیشتنی مەرسومی سەرۆكی هەرێم بۆ ئەنجامدانی هەڵبژاردن، ئەو كاتیش نوسراویان بۆ كردون پێیانوتن ئەوە نوسراوێك گەیشتووە پێویستە ئەو كۆمسیۆنە كارا بكرێتەوە بۆ هەڵبژاردن، ئێستاش چاوەڕێی پەرلەمانن.
سەرۆكی كۆمسیۆنی باڵای سەربەخۆی هەڵبژاردنەكان جەختی لەوەش كردووەتەوە، هەموو حزبەكان دەڵێن ئێمە لەگەڵ ئەوەین هەڵبژاردنەكان لەكاتی خۆیدا بكرێت، بەڵام دەزانن بەبێ كاراكردنەوەی كۆمسیۆن ئەو هەڵبژاردنە ناكرێت، پێشی وایە كە ئەنجامنەدانی هەڵبژاردن بژاردەیەكی ئاسان نییە و پێویستە ئەو كۆمسیۆنە كارابكرێتەوە یاخود كۆمسیۆنێكی نوێ هەڵبژێردرێت.
