جۆرێكی كوشندەی ڤایرۆسی كۆرۆنا لە پرتوگال بڵاودەبێتەوە و دەیان گیانلەدەستدانی لێكەوتووەتەوە، بەهۆی ئەوەشەوە وڵاتانی ئەوروپا بیر لە دووبارە گرتنەبەری رێوشوێنی خۆپارێزی دەكەنەوە.
رۆژنامەی “گاردیان”ی بەریتانی بڵاویكردووەتەوە، لە پرتوگال توشبووان و گیان لەدەستدان بە كۆرۆنا بەشێوەیەكی بەرچاو بەرزبووەتەوە و حكومەتی ئەو وڵاتە رۆژی چوارشەممە تۆماركردنی 26 هەزار و 848 توشبوو و 47 گیانلەدەستدانی بەهۆی جۆرێكی ئەو ڤایرۆسەوە راگەیاندووە.
ئەوەش هاتووە، جۆرەكە سەربە نەوەی ئۆمیكرۆنە و بە BA.5 ناسراوە و مەترسی ئەوەی هەیە شەپۆلێكی نوێی ڤایرۆسەكە بێت، بەهۆی ئەوەشەوە وڵاتانی ئەوروپا بیر لەوە دەكەنەوە دووبارە رێوشوێنی خۆپارێزی بگرنەبەر، ئەوەش لەكاتێكدایە خەریك بوو كۆرۆنا لە یادەوەری هاوڵاتیاندا دەچووەدەر.
لای خۆشیەوە رێكخراوی تەندروستی جیهانی هۆشداریداوە لەوەی، لەوانەیە گۆڕاوێكی نوێی كۆرۆنا بڵاوببێتەوە كە زۆر كوشندە بێت و هیچ یەكێك لە ڤاكسینەكان كاریگەری نەبێت لە دژی.
