ئامینەكاكە باوە، ئەندامی پەرلەمانی سویدە، وەك پێشتر دەنگی ئەو یەكلاكەرەوە بوو بۆ پێكهێنانی كابینەی حكومەتی سوید، بە هەمانشێوە ئێستاش دەنگی ئەو پەرلەمانتارە كوردە چارەنووسی حكومەتی سوید یەكلایی دەكاتەوە و ئەویش چەند مەرجێكی هەیە.
مانگی حوزەیرانی ساڵی ڕابردوو، كابینەی حكومەتی سوید لەلایەن سوسیال دیموكراتەكانەوە پێكهێنرا، ئەوكاتە ئامینە كاكەباوە دەنگی یەكلاكەرەوەبوو لە نێوان سۆسیال دیموكراتەكان و لیبراڵەكان، ئەوكات ئامینە چەند مەرجێكی تایبەت بە ناوخۆیی سوید و هەروەها، مەسەلەی كورد كرد بە مەرج بە دەنگدان بە كابینەی حكومەت.
دوای ساڵێك لە پێكهێنانی كابینەی حكومەتی سوید، لە پەرلەمانی ئەو وڵاتە پرۆژەیەك پێشكەشكراوە بۆ متمانە وەرگرتنەوە لە مۆرگان یۆهانسۆن، وەزیری دادی سوید، ماگدالینا ئەندەرسۆن، سەرۆك وەزیرانی سوید بەڵێنی داوە، ئەگەر لە دانیشتنەکەی ئەم هەفتەیەی پەرلەماندا متمانە لە وەزیری داد بسەنرێتەوە، دەستلەکار دەکێشێتەوە.
وەزیری دادی سویدیش بۆ مانەوە لە پۆستەکەی، تەنیا پێویستی بە دەنگی پەرلەمانتاری کورد ئامینە کاکەباوەیە و ئەو پەرلەمانتارە كوردە چارەنووسی حكومەتی سوید یەلاكلایی دەكاتەوە.
ئامینە كاكەباوە وەك چۆن ساڵی ڕابردوو بە چەند مەرجێك دەنگی بە پێكهێنانی كابینەی حكومەتدا، لە ئێستاشدا چەند مەرجێكی داناوە بۆ دەنگنەدان بە متمانە وەرگرتنەوە لە وەزیری داد و مانەوەی كابینەی حكومەت.
نەفرۆشتنی چەك بە توركیا و هەروەها، دادكۆكی كردن لە دۆزی كورد بە تایبەت لە ڕۆژئاوای كوردستان، بەشێكن لە مەرجەكانی ئامینە كاكەباوە بۆ هەڵنەوەشاندنەوەی كابینەی سۆسیال دیموكراتەكانی سوید.
ئامینە كاكە باوە، لە گوندی تورجانی شاری سەقزی رۆژهەڵاتی کوردستان لەدایكبووە، لە تەمەنی ١٤ ساڵیدا بووە بە پێشەمەرگەی کۆمەڵە، لە ساڵی ١٩٩٢ەوە لەسويد دەژی، ١٧ ساڵە کاردەکات لەناو پارتی چەپی سوێدی دوو خولە ئەندامی پەرلەمانی سويدە.
