لیوا قارەمان كەمال جێگری سوپاسالاری پێشمەرگە رایگەیاند، هەموو هێزی پێشمەرگە یەك جۆر جلوبەرگی دەبێت و چەند دیزاینێك پێشنیار كراون بۆ ئەوەی جیاواز بێت لە هەموو جلوبەرگی سەربازیی دەوروبەرمان.
لیوا قارەمان كەمال بە ماڵپەڕی فەرمی پارتی وتووە، لە چوارچێوەی پرۆژەی چاكسازی لە وەزارەتی پێشمەرگە یەكێك لەبەرنامەكانی چاكسازی ئەوەیە كە هەموو هێزی پێشمەرگە دەبێت یەكپۆش بێت و یەك جۆری جلوبەرگی هەبێت و جلەكەش جیاوازبێت لە هەموو جلی سەربازی دەوروبەرمان.
ئاماژەی بەوەشداوە، ئێستا سەرقاڵی ئەو پڕۆژەیەن بۆ ئەوەی بچێتە بواری جێبەجێكردنەوە، بۆ ئەو مەبەستەش چەند كۆبوونەوەیەك ئەنجامدراوە و چەند دیزاینێك دیاریكراوە و گفتوگۆی لەسەر دەكەن بۆ ئەوەی دیزاینێكیان دیاری بكرێت.
جێگری سوپاسالاری پێشمەرگە هێمای بۆ ئەوەشكردووە، ئەوە هەنگاوێكی زۆر باشە هێزی پێشمەرگە لە هەموو شوێنێك یەك جۆری جلوبەرگی دەبێت و یەكپۆشبێت.
