ئەندامێكی كوردی پێشووی پەرلەمانی عیراق بڵاویكردووەتەوە، بەپێی سەرچاوە ئەمنییەكان كوژرانی بەرپرسێكی مۆسادی ئیسرائیلی لە شاری هەولێر راستە.
سەردار عەبدوڵڵا پەرلەمانتاری پێشوو لە تۆڕی كۆمەڵایەتی تویتەر بڵاویكردووەتەوە، سەرچاوە ئەمنییە ئاگادارەكان ئەوەیان ئاشكرا كردووە كە هەواڵی كوشتنی ئەفسەرێكی ئیسرائیل لە شاری هەولێر 100% راستە.
باسی لەوەش كردووە، ئەو بەرپرسەی ئیسرائیل فەرماندەی یەكەی تیرۆركردنە لە دەزگای مۆساد، بەپێی وتەی سەرچاوەكە ئەفسەرەكە ناوی “نۆڤار بوكر”ە.
شەوی رابردوو لە رێگەی درۆنێكەوە هێرش كرایە سەر چەند ئۆتۆمبێلێك لەسەر رێگەی هەولێر – پیرمام و بەپێی هەندێك سەرچاوە ئامانجەكە ئەفسەرێكی ئیسرائیلی بووە، بەڵام ئەنجومەنی ئاسایشی هەرێمی كوردستان بە توندی ئەوەی رەتكردەوە و ئەو هەواڵانەی بە مایەی گاڵتەجاڕی وەسف كرد.
