شاخەوان عەبدوڵڵا جێگری دووەمی سەرۆكی پەرلەمانی عیراق رایگەیاند، كورد بەشێوەیەكی گشتی تەنها لە بودجەی گەشەپێدانی پارێزگاكان لە پرۆژە یاسای ئاسایشی خۆراك سودمەند نییە، ئەگەرنا لەوانەی دیكە هەمووی سوودمەندە.
شاخەوان عەبدوڵڵا بە ماڵپەڕی فەرمی پارتی وتووە، پەسەندكردنی پرۆژە یاسای ئاسایشی خۆراك بەشێوەیەكی گشتی لە بەرژەوەندی كوردیشدایە، لەوانەش پارەی جوتیارانی هەرێم كە چەندین ساڵە نەدراوە و ئێستا تێیدا جێگیركراوە كە بدرێت و تاوەكو رۆژی دەنگدانیش تێیدا نەبوو، بەڵام زیادیان كرد و پارەی جوتیاران بە تەواوی دەدرێت.
ئاماژەی بەوەشداوە، هەروەها لە پارەی بەشە خۆراكی مانگانەش كە 5 ترلیۆن دیناری تێدایە هەمووان سودمەندن و لە پشتگیری پۆلیسی سنوریش سودمەندین و 25 ملیاریش بۆ رزگاربووانی دەستی داعش دانراوە، بڕی 50 ملیار دینار بۆ ئاوارەكانی هەرێم تەرخانكراوە و هەموو ئەو ئەفسەر و پۆلیسانەی كورد لە سوپابوون و بەهەر هۆكارێك وازیان هێناوە دەتوانن لەچوارچێوەی تەرخانكردنی 400 ملیار دینار بگەرێنەوە بۆ شوێنی خۆیان.
جێگری دووەمی سەرۆكی پەرلەمانی عیراق وتوشیەتی، لەو پارەیەش كە بۆ كارەبا دانراوە سودمەند دەبین وەكو كوردەكانی ئەو ناوچانە لە كەركوك و موسڵ و دیالە، ئەوەی سودی نییە بودجەی گەشەپێدانی پارێزگاكانە كە پشكی هەرێم دانەنراوە و لە كەركوك ئێمە بەسەدان گرێبەستمان هەیە كە 90%ی گرێبەستی پۆلیسی نەوت كوردن و لە شارەكانی دیكەش گرێبەستمان هەیە، لەوەش كورد سودی لێ وەردەگرێت.
