شاندێكی یەكێتیی نیشتمانیی كوردستان و حكومەتی هەرێمی كوردستان كۆدەبنەوە.
مەسرور بارزانی سەرۆكی حكومەتی هەرێمی كوردستان بڵاویكردۆتەوە، بە ئامادەبونی قوباد تاڵەبانی جێگری سەرۆكی حكومەت پێشوازیمان لەشاندێكی باڵای یەكێتی بە سەرۆكایەتی بافڵ جەلال تاڵەبانی سەرۆكی یەكێتی نیشتمانیی كوردستان كرد.
راشیگەیاندوە، لە كۆبونەوەیەكدا كە مەحمود محەمەد ئەندامی مەكتەبی سیاسی پارتی ئامادەی بووە جەختمان لە گرنگی پاڵپشتی و پشتگیریكردنی حكومەتی هەرێمی كوردستان و كارنامە چاكسازییەكەی كرد بە ئاڕاستەی زیاتر خزمەتكردنی هاووڵاتیان، هەروەها تاوتوێی چارەسەركردنی ئەو كێشانەمان كرد كە پێویستیان بە چارەسەرە.
مەسرور بارزانی بڵاویشیكردۆتەوە، لەكۆبونەوەكەدا ئاماژەمان بەوەدا كە حكومەتی هەرێم كارنامەیەكی چاكسازی هاوبەشی هەیە كە هی هەموو لایەنە بەشدارەكانی حكومەتەو پێویستە وەك یەك تیم بە هاوكاری و پشتیوانی هەموو لایەنە كوردستانییەكان كار لە پێناو جێبەجێكردنی كارنامەكەو خزمەتكردنی هاووڵاتیان لە سەرتاسەری هەرێمی كوردستان بكەین.
هەروەها شاندی باڵای یەكێتییش جەختی لە پشتیوانیكردنی حكومەتی هەرێمی كوردستان و سەرخستنی كارنامە چاكسازییەكەی و داكۆكیكردن لە ماف و دەسكەوتەكانی گەلی كوردستان كردۆتەوە.
