لەشاری هەولێر تۆڕی هەماهەنگی رێكخراوەكان كۆنفرانسێكی لەژێر ناوی (مادەی هۆشبەر، ئەو مەترسییەی لە بەردەم هەموانە) رێكخست.
جوتیار عادل وتەبێژی حكومەتی هەرێمی كوردستان لەو كۆنفرانسەدا رایگەیاند: هەرێمی كوردستان بەهۆی هەڵكەوتەكەیەوە ئەگەری بەركەوتنی پریشكی جۆرەها كێشەو ئاگری هەیە، هەندێك پرس هەن كە هێواشن و درەنگ هەستیان پێدەكرێت، بەڵام لەشەڕی راستەوخۆ مەترسیدارترن، بۆ نمونە ماددەی هۆشبەر كە لەئێستادا سەرەڕای كارە بەردەوامەكانی حكومەتی هەرێمی كوردستان بۆ روبەڕوبونەوەی، بەڵام بەپێی ئەو ئامارانەی كە لەبەردەستماندایە بەكارهێنان و فرۆشتنی ماددەی هۆشبەر لە هەرێمی كوردستان تەشەنەی كردوە، هەرچەندە نەگەیشتووەتە ئاستێك كە جێگەی مەترسی بێت و لەچاو هەموو وڵاتانی دراوسێش دەتوانین بڵێین هەرێمی كوردستان لە هەمویان باشترە.
راشیگەیاندوە: ئەوەی زیاتر جێگەی دڵخۆشیە ئەوەیە تائێستا لە هەرێمی كوردستان هیچ جۆرە ماددەیەكی هۆشبەر بەرهەم نەهاتووەو ئەوەی هەبوە هەموی لە وڵاتانی دەوروبەرەوە بۆمان دێت كە ئەویش وەكو ترانزێت دێت و بۆ وڵاتانی دیكە دەنێردرێت كە رێژەیەكی زۆر كەمەو توانراوە 70% بۆ 80%ی ئەوانەی كاری ترانزێتیان بەو ماددەیەوە كردوە دەستگیر بكرێن.
