پەرلەمانی كوردستان بەدەنگی 79 پەرلەمانتار یاسای نەوت و غازی هەموار كردەوەو چەند فراكسیۆنێك دەنگیان پێنەدا.
گوڵستان سەعید سەرۆكی فراكسیۆنی گۆڕان لە پەرلەمانی كوردستان رایگەیاندوە: لە دانیشتنەكەدا بەدەنگی 79 پەرلەمانتاری پارتی و یەكێتی و كۆتاكان دەنگیان بە هەموارەكەداو رەزامەندبون و گۆڕان و لایەنەكانی دیكە دەنگیان پێنەدا.
سەرۆكی فراكسیۆنی گۆڕان هۆكاری دەنگنەدانی فراكسیۆنەكەی بەهەمواری یاسای نەوت و غاز بۆ سایتی حزبەكەی ئاشكراكردوەو وتویەتی: یاساكە كۆمەڵێك بڕگەو مادەی دیكەی تێدایە كە پێویستیان بە هەموار كردنەوە بو، هاوكات سندوقی داهاتە نەوتییەكان دەبو دروستبكرێت، بەڵام تائێستا دروست نەكراوە.
وتوشیەتی: ئەو مادەیەی هەموار دەكرا پێویستی بە هەموار نەدەكرد، كۆمەڵێك بڕگەو مادەی دیكەی نێو یاساكە هەیە كە پێویستی بە هەموار كردنەوە بو كە بەداخەوە تائێستا بیری لێنەكراوەتەوە، ئێمە هەمیشە پێداگر بوین لەسەر یەكێك لە بڕگەو مادەكانی یاساكە كە دروستكردنی سندوقی داهاتە نەوتییەكانە، بەڵام تائێستا حكومەت ئەو سندوقەی دروست نەكردوە، لەكاتێكدا لە هێڵەگشتیەكانی كارنامەی كابینەی نۆی حكومەتدا ئاماژە بەو كراوە لەم كابینەیەدا ئەو سندوقە دروستبكرێت، بۆیە پێمانوابو زیادكردنی ئەندامێك بۆ ئەو ئەنجومەنە زیادەیەو بابەتی پێویست تر هەیە، بۆیە دەنگمان بە هەموار كردنەكە نەدا.
