بەمەبەستی بەجێگەیاندنی فەریزەی حەج و دوای مانەوەیان بۆ ماوەی پێنج رۆژ لەشاری مەدینە، هەموو حاجیانی كوردستان گەیشتونەتە شاری مەككە بۆ ئەنجامدانی فەریزەی حەج.
شێخ نیاز راغب نەقشبەندی بەڕێوەبەری گشتی حەج و عومرەی هەرێمی كوردستان بەسایتی حكومەتی هەرێمی راگەیاندوە: بەپێی ئەو پلان و بەرنامەیەی ئەمساڵ دانراوە توانیومانە بەشێوەیەكی رێك و بێكێشەو گرفت خزمەتی حاجیان بكەین، لە شاری مەككە حاجیانی كوردستان جیا لەحاجیانی عیراق هۆتێلی تایبەت و نزیكیان بۆ گیراوەو رۆژانە بە پاس هاتۆچۆیان پێدەكرێت بۆئەوەی بتوانن بە ئاسانترین شێوە ئەركە ئایینەكانیان جێبەجێ بكەن.
هەر لە لێدوانەكەیدا بەڕێوەبەری گشتیی حەج و عومرە باسی لەوەشكردوە كە وەزیری ئەوقاف و كاروباری ئایینی پاڵپشت و هاوكار بوە بۆئەوەی ئەمساڵ جیاواز لە ساڵانی پێشوو خزمەتێكی باشی حاجیانی هەرێمی كوردستان بكرێت.
وتوشیەتی: لەڕێگەی لیژنەی پزیشكی و فەرمانبەرانەوە رێنمایی حاجیان دەكرێت بۆ ئەوەی خۆیان لە شوێنی قەرەباڵغ بپارێزن و لەشوێنی پێویست ماسك ببەستن بۆ ئەوەی دوربن لە توشبون بە نەخۆشی گوازراوەو هەر بۆ ئەم مەبەستە لە رووی كەرەستەی پزیشكییەوە ئامادەكاریی تەواومان كردوە، هەروەها هەماهەنگییەكی زۆر باشیان لەگەڵ دەستەی باڵای حەج و عومرەی عیراق هەیە لەپێناو خزمەتكردنی حاجیان و ئەمساڵ چەندین خزمەتگوزاری جۆراو جۆر پێشكەش بە حاجیان دەكرێت.
