شیكەرەوەیەكی سیاسی عیراقی پێی وایە، توركیا شكستی هێنا لە پاڵپشتی كردنی تیرۆر لە عیراق و ئێستا هێنانی هێزەكانی و جێگیر كردنی لە هەرێمی كوردستان بە ئامانجی كۆنترۆڵ كردنی غازە.
كازم حاج شیكەرەوەی سیاسی رایگەیاندووە، توركیا شكستی هێنا لە پاڵپشتی كردنی تیرۆر لە عیراق، ئەوەش دوای سەركەوتنەكانی حەشدی شەعبی بەرامبەر داعش، بۆیە پیلانەكانی بۆ سودوەرگرتن لە داعش شكستیان پێهێنرا.
ئاماژەی بەوەشداوە، لایەنی ئابوریی توركیا لە باكوری عیراق “هەرێمی كوردستان” پاڵنەری سەرەكی پرۆسەكانیەتی لە ناوچەكانی باكور، ئەوەش لە رێگەی رێكەوتنی پێشوەخت یاخود سەپاندنی ئەمری واقیع بەسەر عیراقییەكاندا بۆ ئەوەی سەروەت و سامانی ئەو ناوچەیە كۆنترۆڵ بكات.
ئەو شیكەرەوە سیاسیە عیراقییە لە بەشێكی تری قسەكانیدا وتویەتی، توركیا دەیەوێت دەستبەسەر سەروەت و سامانی باكوری عیراقدا بگرێت، بەتایبەتی دوای دۆزینەوەی كێڵگەی غاز، هەروەها لە باكوری پارێزگای نەینەواش هێزی هەیە و لەماوەی دوایدا لەو پارێزگایەش كێڵگەی غاز دۆزرایەوە.
