توركیا بەردەوام بەردانەوەی ئاوی عیراق كەمدەكاتەوە و وەزارەتی سەرچاوە ئاوییەكانیش جەخت لەوە دەكاتەوە، ماوەی 100 ساڵە ئاو هێندە كەم بەرنەدراوەتەوە.
لەو بارەیەوە عەلی رازی وتەبێژی وەزارەتی سەرچاوە ئاوییەكانی عیراق لە بەیاننامەیەكدا رایگەیاندووە، لە رێگەی ئینتەرنێتەوە نێردەی تایبەتی سەرۆكی توركیا و وەزیری سەرچاوە ئاوییەكانی عیراق كۆبوونەوەیەكیان ئەنجامداوە و تێیدا جەخت لە گرنگی بەردەوامی گفتوگۆكان و كاركردن بۆ هاوبەشی كردنی زیانەكانی گۆڕانكاری ژینگەیی كراوە.
رونیشیكردووەتەوە، تۆمەتەكانی توركیا سەبارەت بەوەی كە عیراق ناتوانێت ئیدارەی ئاو بدات رەتدەكەنەوە، رێژەی بەردانەوەی ئاو لە توركیاوە بۆ عیراق لە نزمترین ئاستیدایە لە 100 ساڵی رابردودا.
ئەو وتەبێژە پێشی وایە، هۆكاری سەرەكی قەیرانی ئاو لە عیراق ئەوەیە كە دەوڵەتانی سەرچاوەی ئاو سیاسەتی زیانگەیاندن بە عیراق پەیڕەو دەكەن، ئەوەش لە رێگەی دروستكردنی بەنداو، هەروەها رەتیدەكەنەوە یاداشتی تایبەت بە داننان بە پشكی دادپەروەرانەی ئاوی عیراق بەپێی یاسا نێودەوڵەتییەكان رەتدەكەنەوە.
