ئەندامێكی پەرلەمانی كوردستان رایگەیاندوە، ساڵانی رابردوو بەدەگمەن منداڵ توشی شێرپەنجە دەبون، بەڵام ئێستا بە لێشاوە.
عەلی حەمە ساڵح ئەندامی پەرلەمانی كوردستان وێنەیەكی ناو نەخۆشخانەی هیوا بۆ چارەسەری نەخۆشی شێرپەنجەی بڵاوكردۆتەوەو پەیامێكی ئاڕاستەی سەرۆكی حكومەتی هەرێم و جێگرەكەی كردوەو رایگەیاندوە، وێنەكە توشبوانی نەخۆشی شێرپەنجەن لە نەخۆشخانەی هیوا، ساڵانی رابردوو بەدەگمەن منداڵ توش دەبون، بەڵام ئێستا بەلێشاوە.
راشیگەیاندوە، ماوەیەكی زۆرە لەگەڵ چەندین كەسی پسپۆر لێكۆڵینەوە دەكەین لەسەر هۆكاری زیادبونی شێرپەنجەو دووكەڵی ژەهراوی، ئێستاش رێژەی توشبوان بەشێوەیەكی بەرچاو زیادیكردوەو دەرمانیش نیە، كەی رەوایە گازوایلی باشی پاڵاوگەكان بەنایاسایی ببرێتە دەرەوەو لە تێكەڵكردنی رۆنی پیس و مادەی كیمیاوی بەناو گازوایل بۆ مۆلیدەو ناوخۆ دروستبكرێت كە دوكەڵەكەی ژەهراویەو هۆكارێكی سەرەكی شێرپەنجەیە، گازوایلی مۆلیدە هیچی پشكنینی بۆ ناكرێت، چونكە لە پشكنین دەرنەدەچون رایان گرت.
عەلی حەمە ساڵح راشیگەیاندوە، خراپترین بەنزین و دوكەڵی كارگەو پیسبونی ئاو و هەندێك خواردن گەورەترین مەترسین لەسەر ژیانی هاوڵاتی، ئەمە قسەی یەكێك لە پسۆڕەكانە كە لێكۆڵینەوەی كردوە، بۆیە ئەگەر بەمشێوەیە بەردەوامبن چەند ساڵی ئاییندە كەم ماڵ هەیە یەكێكی توشی شێرپەنجە نەبێت، نەبونی دەرمان و ئامێری پێویستیش لەولاوە بوەستێت و بارگرانی زۆر گەورەی دروستكردوە.
