ئیئتیلافی دەوڵەتی یاسا رایگەیاند، ھەڵسوکەوت و سیاسەتی رۆژانەی مستەفا کازمی تەنھا بۆ ئەوەیە لە دەسەڵاتدا بمێنێتەوە.
(فازڵ زریجاوی) ئەندامی ئیئتیلافی دەوڵەتی یاسا کە نوری مالیکی سەرۆکایەتی دەکات رایگەیاند، زۆر لایەن ھەیە لە عێراق تائێستاش کار بۆ ئەوە دەکەن (مستەفا کازمی) لە پۆستەکەیدا بمێنێتەوە، سیاسەت و ھەڵسوکەوتی رۆژانەی خودی کازمیش تەنھا بۆ ئەوەیە پشتیوانی چەند لایەنێکی ناوخۆیی و دەرەکی بەدەستبھێنێت بە مەبەستی مانەوە لە پۆستی سەرۆک وەزیران کەئەوەش ھێندەی تر قەیرانەکان ئاڵۆزتر دەکات، بەتایبەتی کە بەشێک لە لایەنەکان بە باشی دەزانن کەسێکی دیکە ئەو پۆستە وەربگرێت.
وتیشی، ئەوەی ئێستا لە ناوچەی سەوز لە بەغداد رودەدات، راستەوخۆ کازمی لە پشتێتی، چونکە ئەگەر ئەو رێگەی نەدایە و دەرگای بۆ نەکردنایەتەوە، بەھیچ شێوەیەک خۆپیشاندەران نەدەگەیشتنە ناوچەی سەوز و نەیاندەتوانی بچنە ناو ئەنجومەنی نوێنەرانەوە و بە تەواوی دەستی بەسەردا بگرن.
