شاخەوان عەبدوڵڵا جێگری دووەمی سەرۆكی پەرلەمانی عیراق دەڵێت، چوارچێوەی هەماهەنگی یەكێتیان لە پارتی جیاكردەوە، ئێستاش كاندیدی یەكێتی بۆ پۆستی سەرۆك كۆمار لەلایەن رەوتی سەدر هێڵی سورە.
شاخەوان عەبدوڵڵا بە دەنگی ئەمریكای وتووە، گفتوگۆ لەنێوان پارتی و یەكێتی هەیە بەداخەوە لایەنی چوارچێوەی هەماهەنگیش پێشتر رۆڵێكی باشی نەبینی ئێمە و یەكێتی بەیەكەوە بووین شاندی دانوستان بوین، بەڵام یەكێتیان لەپارتی جیاكردەوە و وایانكرد یەكێتی بەجیا بڕوات و كاندید پێشكەش بكات لەكاتێكدا كە ئەو پۆستە دەبێت كورد رێككەوتنی لەسەربكات و كۆدەنگی كوردی لەسەربێت.
باسی لەوەش كردووە، هانی یەكێتیاندا بەوەی هەرچەندە كەمینەی كوردن لەناو پەرلەمان بەڵام كورسی سەرۆك كۆماریان دەدەنێ جۆرێك ئیغرایان كردن ئەنجامەكە وایلێهات كە ئەوانیش بە هەڵەدا ببرێن.
جێگری دووەمی سەرۆكی پەرلەمانی عیراق رونیشیكردووەتەوە، ئێستا لەنێوان پارتی و یەكێتیدا گفتوگۆ هەیە بەڵام هێشتا شتێكی كۆنكرێتی نییە كە چۆن رێككەوتن بكەن، بەڵام كاندیدەكەی ئەوان لەلایەن چوارچێوەی هەماهەنگی و رەوتی سەدریش رەتكراوەتەوە، بەلای رەوتی سەدرەوە نەك هەر كاندیدی سەرۆك وەزیران كاندیدی سەرۆك كۆماری یەكێتیش دیسان هێڵی سوری لەسەرە.
