سەرچاوەیەك لە وەزارەتی دارایی و ئابوریی حكومەتی هەرێم ئاشكرای كرد، بڕی 900 ملیار دینار بۆ دابەشكردنی موچەی مانگی 8 ئامادەیە.
ئەو سەرچاوەیە بە میدیاكانی پارتی وتووە، لە چەند رۆژی داهاتوودا خشتەیەكی نوێی موچە رادەگەیەنرێت و بڕی 900 ملیار دینار بۆ دابەشكردنی موچەی مانگی 8 ئامادەیە، بەڵام پێشبینی ئەوە دەكەن كە جارێكی تر گرفتی دابەشكردنی موچە لە پارێزگای سلێمانی دروست ببێت.
بەپێی وتەی هەمان سەرچاوە، پێویستە لە چەند رۆژی داهاتوودا هەوڵی جددی بدرێت بۆ چارەسەر كردنی گرفتەكە، بە پێچەوانەوە گرفتی موچە لە سلێمانی دروست دەبێت، چونكە 35 ملیار دیناری مانگی 8 بۆ موچەی مانگی 7 خەرج كراوە، ئەوەش كێشە دروست دەكات.
مانگی پێشووش هەمان گرفت لە پارێزگای سلێمانی دروست بوو و بڕی 30 ملیار دینار لە داهاتی مانگی 7 بۆ موچەی مانگی 6 خەرج كرا و بەهۆی ئەوەشەوە دابەشكردنی موچەی مانگی 7 دواكەوت.
