رۆژنامەیەكی ئەمریكی بڵاویكردووەتەوە، هاوڵاتیانی عیراقی زۆر بە كەمی بەشداری لە هەڵبژاردن دەكەن چونكە دەزانن هەمان سیاسیە گەندەڵەكان لە دەسەڵاتدا دەمێننەوە و لە وڵاتی پڕ لە نەوتدا هاوڵاتیان لە هەژاریدا دەژین، عیراق بووەتە مەترسی لەسەر ئاسایشی ناوچەكە.
رۆژنامەی “نیویۆرك تایمز” لە راپۆرتێكدا ئاماژەی بەوەداوە، كێشمەكێشی گروپە سیاسیەكان لەسەر دەسەڵات بووەتە هۆی هەڵگیرسانی شەڕی تاییفی و ئێستا مەترسی لەسەر سەقامیگری عیراق هەیە كە خۆی لە خۆیدا لاوازە، لەماوەی رابردودا خاڵە لاوازەكانی عیراق زۆر بە ئاشكرا دەركەوتن ئەوەش كاتێك كە پێكهێنانی حكومەت بە بنبەست گەیشت، ئەوەش سەرەڕای ئەوەی نزیكەی ساڵێكە هەڵبژاردن كراوە و توندوتیژی لە بەغدای پایتەخت دروست بوو.
لای خۆیەوە ماریا فانتابی لە ناوەندی گفتوگۆی مرۆیی كە رێكخراوێكە تایبەت بە ئیدارەدانی كێشمەكێشەكان وتویەتی، دوای ساڵی 2003 دەبێت بڵێین عیراق هەرگیز دەوڵەتێكی چالاك نەبووە، سەرۆك وەزیرانێكی نەبووە دەسەڵاتی تەواوی بەسەر هێزە چەكدارەكان و سنورەكاندا هەبێت، متمانەیەكی كەم بە سیستمی سیاسی هەیە بەشێوەیەك لە شارێكی وەك بەغدا تەنها 30% هاوڵاتیان بەشدارییان لە دەنگدان كردووە، چونكە دەزانن هەمان سیاسیە گەندەڵەكان دەسەڵات وەردەگرن كە لە ساڵی 2003ەوە لە دەسەڵاتدان.
نیویۆرك تایمز باسی لەوەش كردووە، تاكە هۆكار تاوەكو ئێستا رێگەی لە روخانی عیراق گرتووە ئەو سەروەتە زۆرە نەونیەیە كە هەیەتی، بەڵام زۆرینەی هاوڵاتیان پێیان وایە هیچ سودێكی بۆ ئەوان نییە، كارەبا رۆژانە دەبڕێت و خوێندنگەكان كاولن و خزمەتگوزاری تەندروستی باش نییە و تەنانەت ئاوی پاكیش كەمە و دەوڵەت ناتوانێت خزمەتگوزاریە سەرەكییەكان دابین بكات، هیچ هەوڵێكی راستەقینە بۆ چاككردنی خزمەتگوزاری نییە و یەك لەسەر چواری هاوڵاتیانی ئەو وڵاتە لە هەژاریدا دەژین.
رۆژنامەكە پێشی وایە، لەگەڵ پێشێلكارییە بەردەوامەكانی ئێران و توركیا، بوونی حكومەت و دامەزراوەی لاواز لە عیراق بووەتە هەڕەشە لەسەر سەقامگیری هەرێمیی، وەك لە ساڵی 2014 رویدا كاتێك سوپای عیراقی لەبەردەم هێرشەكانی داعش روخا و بەشێكی گەورەی خاكی ئەو وڵاتە كەوتە دەست ئەو رێكخراوە.