بەپێی راپۆرتی دەستەی گشتی باجەكان كە ئاراستەی وەزیری دارایی عیراق كراوە، خاوەنی یەكێك لەو 5 كۆمپانیایەی 2.5 ملیار دۆلارەكەی دەستەی باجەكانیان لە بانكی رافیدەین بردووە كوردە و بڕی 477 ملیار دیناری بردووە.
بەپێی راپۆرتەكە كە لە بەرواری 10/10/2022 دەستەی گشتی باجەكان ئاڕاستەی وەزارەتی دارایی كردووە، حوسێن كاوە عەبدولقادر خاوەنی كۆمپانیای “ریاح بەغدا” بۆ بازرگانی گشتی سنوردار لە بەرواری 30/10/2021 لە شوێنی “عەبد عەلی سالم” بووەتە بەڕێوەبەری رێپێدراوی كۆمپانیاكە و دواتریش سەرجەم پشەكەكانی كڕیوە.
راپۆرتەكە ئەوەشی تێدا هاتووە، هەر 5 كۆمپانیاكە لە رێگەی 247 چەكی بانكی زیاتر لە 3 ترلیۆن و 500 ملیار دیناری عیراقییان راكێشاوە، بەشێوەیەك كۆمپانیای “حوت ئەحدب” بڕی 982 ملیار دینار و كۆمپانیای “ریاح بەغدا” بڕی 447 ملیار و كۆمپانیای “قانت” بڕی یەك ترلیۆن و 185 ملیار و كۆمپانیای “موبدیعون” بڕی زیاتر لە 433 ملیار دو كۆمپانیای “بادیە ئەلمەساْ “یش بڕی 624 ملیار دیناری راكێشاوە.
لەبارەی ئەو دزیە گەورەوە ئەحمەدی حاجی رەشید ئەندامی پێشووی لیژنەی دارایی پەرلەمانی عیراق وتویەتی، دزییەكە كە بە “دزیی سەدە” ناونراوە بۆ سەردەمی كابینەی حەیدەر عەبادی دەگەڕێتەوە، كۆمپانیاكان وەهمین و لەلایەن كەسانی دەستڕۆیشتووی هێزە سیاسیەكانەوە دروست كراون.
جەختی لەوەش كردووەتەوە، یەكێك لە كۆمپانیاكان ناوەكەی كوردییە و خاوەنەكەی تەنها 21 ساڵە و رەگەزنامەكەی لە هەولێر دەركراوە، دوو لە كۆمپانیاكانیش هەمان پارێزەریان هەیە.
