وەزارەتی دەرەوەی روسیا هۆشداری دەدات لەوەی، هاوپەیمانی باكوری ئەتڵەسی ناسراو بە “ناتۆ”، نزیك بووەتەوە لە ئاستێكی مەترسیداری روبەڕوبونەوەی سەربازی راستەوخۆ لەگەڵ روسیا.
كونستانتین فۆرۆنسۆف بەرپرس لە وەزارەتی دەرەوەی روسیا وتویەتی، ناتۆ سەبارەت بە دەستوەردانەكانی لە بارودۆخی ئۆكرانیا بێدەنگی هەڵبژاردووە، لەكاتێكدا پشتگیری كیێف دەكات و چەك و زانیاری هەواڵگری دەداتێ و ئیدارەی پرۆسەكانی شەڕ لەو وڵاتە دەكات.
وتوشیەتی، ئەمریكا پشكی شێری بەردەكەوێت لە سودەكانی بەردەومبوونی شەڕ و دەوڵەتانی ئەوروپی ناچار كردووە كە چەك لە واشنتن بكڕن و بینێرن بۆ ئۆكرانیا، ناتۆ بەشێوەیەكی مەترسیدار نزیكبووەتەوە لە پێكدادانی راستەوخۆی سەربازی لەگەڵ روسیا.
ئەوەش دوای ئەوەدێت، كە چەند رۆژی رابردودا ناتۆ مانۆڕێكی سەربازی بەناوی “بەرپەرچدانەوەی ئەتۆمی” لە زەریای باكور و بەلجیكا و بەریتانیا ئەنجامدا.
