بەپێی پێشبینییەكانی كەشناسی، ئەمڕۆ شەممە بارانبارین دەست پێدەكاتەوە و سبەینێش لە هەندێك ناوچە نمەباران بەردەوام دەبێت.
بەشی پێشبینییەكانی بەڕێوەبەرایەتی كەشناسی و بومەلەرزەزانی سەربە وەزارەتی گواستنەوە و گەیاندنی حكومەتی هەرێم بڵاویكردووەتەوە، ئەمڕۆ شەممە ئاسمان بە شێوەیەكی گشتی لە هەرێمی كوردستان هەوری تەواو دەبێت، لە دوای نیوەڕۆ بارانبارین دەست پێدەكات لە ناوچەكانی سلێمانی و گەرمیان و كەركوك و لەگەڵ هەندێك ناوچە شاخاویەكانی سەر بە پارێزگای هەولێر.
ئەوەش هاتووە، لە كاتەكانی شەودا رێژەی دابارین لە پارێزگای سلێمانی زیاتر دەبێت لەگەڵ بارینی كڕێوە و بەفرێكی كەم لە ناوچە شاخاویەكان و پلەكانی گەرماش نزیك دەبن لە تۆماركراوەكانی رۆژی هەینی.
بەڕێوەبەرایەتییەكە هێمای بۆ ئەوەش كردووە، هەرچی رۆژی یەكشەممەیە ئاسمان هەوری تەواو دەبێت هەندێكجار دەگۆرێت بۆ نیمچە هەور، لەكاتەكانی بەیانی زوودا لە ناوچەكانی سەر بە پارێزگای سلێمانی نمە باران دەبێت و پلەكانی گەرما یەك بۆ 2 پلە بە بەراورد لە تۆماركراوی رۆژی پێشوو بەرزدەبنەوە.
