سكرتێری ئەنجومەنی وەزیرانی هەرێمی كوردستان رایگەیاند، حكومەتی هەرێمی كوردستان زیاتر لە 31 ملیار دۆلار قەرزدارەو قەرزی حكومەت زیادی كردوە.
ئامانج رەحیم، سكرتێری ئەنجومەنی وەزیرانی هەرێمی كوردستان رایگەیاند، گۆڕانكاری بەسەر قەرزەكاندا هاتووەو قەرزەكانی سەر حكومەت گەیشتوونەتە 31 ملیار و 637 ملیۆن دۆلار.
وتیشی: حكومەتی هەرێمی كوردستان قەرزی نەكردووە، بەڵام پارەی پێشەكی لە كۆمپانیاكانی نەوت وەرگرتووە، بەشێكی دیكەیشی بریتییە لە مووچە پاشەكەوتكراوی مووچەخۆران ئەو پارەیەشی كە حكومەت قەرزدارە تا 30-3-2021 هەژماركراوە.
ئامانج رەحیم راشیگەیاند: قەرزەكانی حكومەت دەگەڕێتەوە بۆ دابەزینی بەهای دینار بەرامبەر دۆلارو بەشێكی قەرزەكانیش پاشەكەوتی مووچەخۆرانە كە بڕەكەی 12 ملیار دۆلارە، بەشێكی دیكەی قەرزەكان پەیوەندی بە قەرزی بانكی TBI كە ئەویش نزیكەی چوار ملیار دۆلارەو بڕیارە بە خشتەیەك چارەسەر بكرێت، هەروەها پابەندییە داراییەكانی حكومەت هەشت ملیار دۆلار و 703 ملیۆن دۆلارە، بەشێكیان پارەی بەرهەمهێنانی كارەبایە و دابینكردنی سووتەمەنییە، بەشێكیان پارەی بانكە ئەهلییەكانە، بەشێكیشی قەرزی كۆمپانیا بەرهەمهێنەرەكانی نەوتەو ئەوەی پەیوەندی هەیە بە پارەی پێشەكی كە وەرگیراوە نزیكەی چوار ملیار و 300 ملیۆنە كە لە كڕیارانی نەوت وەرگیراوە.
