سەرۆكی حكومەتی هەرێم بە لە پەیامێكدا لە ساڵیادی جینۆسایدكردنی بارزانییەكان رایگەیاند، سەرباری ئەوەی دادگای باڵای تاوانەكانی عێراق ئەنفالكردنی گەلی كوردستانی بە جینۆساید ناساندووە، بەڵام تائێستا حكومەتی فیدراڵ قەرەبووی كەسوكاری قوربانیانی ئەو تاوانانەی نەكردووە.
مەسرور بارزانی، سەرۆكی حكومەتی هەرێمی كوردستان لە پەیامێكدا لە ساڵیادی جینۆسایدكردنی بارزانییەكان رایدەگەیەنێت “بەڕێز و شكۆوە یادی قوربانیانی یەكێك لە دڕندانەترین و گەورەترین تاوانەكانی رژێمی پێشووی عێراق دەكەینەوە كە 38 ساڵ پێش ئێستا، لە كردەوەیەكی نەژادپەرستانەدا، هەزاران مرۆڤی بێتاوانی بارزانی، تەنیا لەبەر ئەوەی كورد بوون، راپێچی بیابانەكانی باشووری عێراق كرد و كۆمەڵكوژی كردن”.
لە پەیامی سەرۆكی حكومەت هاتووە “لە كاتێكدا یادی قوربانیانی ئەو كۆمەڵكوژیە دەكەینەوە ، لەگەڵ ئەوەی دادگای باڵای تاوانەكانی عێراقیش، ئەنفالكردنی گەلی كوردستانی بە جینۆساید و تاوانی جەنگ ناساندووە، كەچی تا ئێستا لە لایەن حكومەتی عێراقەوە قەرەبووی كەسوكاری قوربانیان نەكراوەتەوە”.
راشیگەیاندووە، “ئەركێكی ئەخلاقی و یاسایی حكومەتی عێراقە، قەرەبووی كەسوكاری قوربانیان و زیانلێكەوتووانی هەمووی ئەو تاوانانە بكاتەوە كە بەرامبەر گەلی كوردستان ئەنجام دراون “.
